I USA har Energidepartementet (DOE) starta opp eit prøveprosjekt for å finne ut om klimagassar kan lagrast permanent under jorda. I løpet av 2002 injiserte amerikanske forskarar ca 2100 tonn CO₂ i tomme oljebrønnar i nærleiken av Hobbs, New Mexico. Denne mengda CO₂ er samanliknbar med ein dags utslepp frå eit gjennomsnitts kolfyrt kraftverk.

Treng fleire data
Olje og gassbrønnar vert rekna som særs eigna til å lagre CO₂ i fordi oljen og gassen opprineleg produsert i desse ikkje har leke ut i grunnfjellet. Geologien rundt gamle olje og gassbrønnar er også nøye kartlagt i tilknyting til oljeproduksjonen der, og ein kan nytte eksisterande data å bygge vidare på i forskingsarbeidet omkring CO₂-deponering.

Trass i store mengder data om geologien i kring oljebrønnane er det naudsynt med feltforsøk på CO₂-deponering. Forskarane overvakar no den lagra gassen for å sjå om det oppstår endringar i steinformasjonane i reservoaret. Sjølv om liknande prosjekt er på gang andre stader i USA, og elles i verda, har ikkje forskarane gode nok data på kor lenge CO₂ gassen kan lagrast, og kva fysiske og kjemiske endringar som kan oppstå i steinformasjonane som vert nytta til lagring.

Bush positiv til CO₂-deponering
Ein har ein relativt omfattande erfaring med CO₂-injeksjon i USA, der CO₂ har vore nytta i oljebransjen i snart 40 år. Det primære målet har likevel aldri vore å deponere CO₂. Det er berre CO₂ sin evne til å auke oljeproduksjonen ein har vore ute etter. Under Bellona sin hydrogenworkshop i EU-parlamentet førre veke, presenterte Michael Austell frå INCO2 erfaringar frå USA som viser at deponering av CO₂ kan gje Norge meir olje frå eksisterande felt.

CO₂-deponering er av president Bush utpeika som ein av dei mest lovande tilnærmingane til å redusere utsleppet av klimagassar på kort sikt, og dette vert undersøkt som ein del av presidenten sitt ”Global Climate Change Initiative”. Bellona Web har tidlegare skrive om eit anna prosjekt i Ohio, USAm der ein no driv med seismiske testar av grunnfjell for å sjå om det er eigna for CO₂ lagring.

Les meir om prosjektet i New Mexico på det Amerikanske Energidepartementet sine heimesider (bruk linken til høyre).